عاجل...رأيك يهمني كثيرا...ما رايك في جراند شيروكي 2009؟؟؟

[مملكة العمر]

السلام عليكم ...

في اول موضوع لي بالمنتدى الجميل بأعضاءه وموضوعاته المفيده فبكم ومنكم نستقيد ومن شار ما خاب فاملي بكم كبير في اخذ المعلومه الصحيحه وانتم مشكورين...


مواصفات تفصيليه : هي جراند شيروكي 2009 ماكينة نوع HIMI بقوة 330 حصان وسعة المحرك 5700 - 8 سلندر...

فل كامل - شاشة لمس (نظام ملاحة) - dvd - كاميرا خلفيه - دفع رباعي مستمر - القير رياضي - زينون - حساسات - مراتب جلد وفتحة سقف - جنط مقاس 18 ... بالاضافه الى العديد من المواصفات الاخرى...

بالنسبة الى السعر وهو ما شجعني اكثر فوجدت عليها عرض من شركة المتحدة للسيارات وتخفيض من 171 الف الى 151 الف ريال...

فالسؤال والمطلوب منك عزيزي القارئ هل تنصحني بشراءها (مع أنني ماني حق طلعات بر وخبال ولكن اذا بغيته يقول تم )ملاحظة 3 نقاط هامة بالنسبة لي :

1- امكانيتي المادية لا تتعدى حدود ال 150 الف ريال.
2- ضروري ان تكون السيارة جديدة وكالة.
3- ارتفاع معظم سيارات الدفع الرباعي التي من فئة الجراند بفارق كبير جدا وبنفس المواصفات تقريبا.

تذكر دائما ان رايك يهمني فلا تبخل علي بالمعلومه الاكيده...

[V8 4x4]

حياك الله أخوي
طبعا أنا مالي خبره بالجديد
لكن أنا كم مرة رحت لحقين قطع الغيار واسأل عن ال 5,7 والله يمدهونه
ويقولون مافيه خربات زي القديم ولد عمي معه قراند 2002 وضب القير عند مكانيكي لعبته الشروكي بالرياض وسأله عن الهمي يقول راعي الورشه يعن ماشاف جديد خربان من 2005 طبعاورايح يعني على كلامه صار أحسن من القديم
وبما أنك منتب راعي كرف أحس أنه مناسب يعني لو أنا مكانك والله ما أفوته خصوصا أني أحب القراند الهمي
وما يقصرون الشباب معك أن شا الله

[مملكة العمر]

مشكووور لك على التوضيح

وانتظر من الاعضاء رأيهم ,,,,,,

[Hamad100]

القراند بمكينة الهمي ماعليه كلام. انا عندي واحد 2006 امريكي اوفرلاند همي. الشي الوحيد المزعج ان خزان البنزين صغير ... وهو يشرب بنزين كانه يشرب مويه ... يعني كل يومين او ثلاثة في المحطة ... خاصة ان الهمي يغريك تدعس له :biggrin:

بس فيه نقطة اهم ابذكرها:

اهم نقطة ان الشكل هذا راح يتغير في 2011 وراح ينزل للاسواق في صيف 2010

بس المشكلة اني ماانصح تشتري الشكل الجديد في اول سنة ينزل لانه دايم يكون فيه خرابات ما يصلحونها الا في الموديل اللي بعده ... يعني اذا بتاخذ الشكل الجديد يبيلك تنتظر الـ 2012

والامر راجع لك

اذا تبي تشوف الشكل الجديد ... حط grand cherokee 2011 في قوقل

[the.jeep]

وش خليت قراند شيروكي الجديدتوكل على الله ودعلي
شكل نشاط هدوء راحه
اما الخرابات ولله انا عرف 4 اثنين منهم 2005واثنين 2007 ماشالله كلهم يمدحونه واحد srt8 ذا حطه على حنب لانه مجرم مقاومات ومكسر روس العالم وشكل الموترخوقاق بس ماشكا منه خرابات

[Jeep KJ]

(مع أنني ماني حق طلعات بر وخبال ولكن اذا بغيته يقول تم )

لو تعذرني

الجيب هذا تطلع فيه بالبر

لكن تحط ببالك انك طالع بـ 150 الف ريال للبر , حلو .. فـ أكيد بتعامله كويس :]

بالنسبه للخرابات انا ما أئمن بهذا المبدئ

لأن على حسب خفه رجلك على الجيب او السياره يكون عيار للخرابات :]

واحس الشكل هذا افضل من اللي بينزل 2011 !

والله يوفقك

[ابو ولـيـــjeepــد]

اخوي الجراند شيروكي الهيمي ولا اروع
وسعره الحين بالوكاله يا 145000 يا 146000 ريال
والسياره دلع
ولكن اهم شي لازم تظرب حسابك بالصيانه مكلفه شوي
وانا اعرف واحد بالوكاله بقسم الصيانه وسبق وقالي ان الهيمي تقريبا كل خمسين الف لازم تغير جنزير المكينه وطرمبة الماي ولاتسلمها اي ورشه
وغير كذا السياره ماشاء الله 100% ولا اروع
والله يوفقك يا رب
تقبل مروري واسف عالاطاله

[طــــــــــلال]

انا اشوف انك تستخير

لان الوضع محير بالنسبة لك

والله ان شاء الله بيخيرك الي فيه خير لك

موفق خير ،،،

[cherokee.1996]

ما خاب من إستخار .. ولا ندم من استشار ,,

استخر قبل لا تشاور في إنك تشتري الهيمي ,,


وأنا أشوف غن القراند شروكي الجديد شكله مجنووون .. وأنا فاق معه الصراحة .. أنا ما قد جربته ولا ركبت فيه ولا أعرف أحد جربه .. لكن أنا أعطيك رأيي في الشكل والقوة جربت مع كوماندر هيمي .. مجنووون ما شاء الله .. نشيط :cool:


وما سألت عن الـ S R T 8 :cool: ?? هذا البطل صح !!


وسعره غويلي الصراحة ... وكل اسعار سيارات جيب مبالغ فيها .,.,.,



أخوك . cherokee.1996