المساعد الشخصي الرقمي

مشاهدة النسخة كاملة : نفود ام دكه

ابورغد
01-30-2010, 01:05 PM
صباح \ مساء الخير على الكل
من دخول الشتاء والشباب يتجمعون في نفود ام دكه كل يوم خميس
مكان نظيف ومرتب ومافيه زحمه وفوضى مثل الثمامه
على العكس فيه تحدي مرهمات وفله:drive1:
بس ألاحظ قلة سيارات الشيروكي هناك مقارنه بالسيارات الثانيه
ودي اقترح على اعضاء ادارة المنتدى ينقل تجمع الخميس من طعس القصمان إلى نفود ام دكه ولو ليوم واحد للتجربه
هذا مجرد إقتراح وآسف على الإطاله.
نــــاصــــر
01-30-2010, 01:39 PM
هلابكـ يـ أبورغد ...

كيف حالكـ طال عمركـ ...؟

والله من زمان وأنا ودي يكون فيه تجمع لنا فـ أمـ دكة ...

بس الشباب مدري وش لاقين فـ الخرابه...أقصد الثمامة ... :biggrin:

ولا والله كل خميس وأنا فـ أمـ دكه وأشوف شروكيات بـ الهبل ...

وتعرفت عـ نصهمـ بس المشكلة إنهمـ موب راعين منتديات ... :biggrin:

وفيه شروكين معدله ما شاء الله عليها أبدعت هناكـ ...

وأهمـ شي إن فيه كباتن معنا هنا معهمـ مرهمات ومستحيل إنه يجي لـ الثمامة يسحب المرهمـ ...

ولا راح يشيله عـ سطحة عشان ساعتين ولا 3 ساعات ...

فـ أنا يـ أبو رغد معكـ في هـ الإقتراح ...

وننتظر باقي الشباب ...
ابورغد
01-30-2010, 02:10 PM
اخوي ناصر مشكور على مرورك
أنا شايفك يوم الخميس الماضي فوق بجنبنا وبدعت وماقصرت
بس انا ودي بباقي اعضاء منتدانا الغالي يتواجدون هناك علشان نرفع من سمعة الشيروكي.
رحال سدير
01-30-2010, 02:13 PM
انا معك ..

ننتظر باقي الاخوان

ولازم ينرسم كروكي للموقع بالفوتوشوب عشان الكل يصير واضح له المكان
W A F I
01-30-2010, 03:17 PM
مرحبا ,,

الف شكر لك اخوي ابورغد في الموضوع الرائع والفكرة ,,

وفكرة حلوة وتغيير عن الثمامة ,,

انا من المؤيديين للفكرة
هاوي شروكي
01-30-2010, 06:49 PM
انا من ناحيتي كل خميس في ام دكه وتلاقوووني فووووووق

وابصراااحه غير ام دكه لا تدوووور لامبزره ولا ازعااااج ولا شي

والراي لكم

بس ابي احط استكررر القروووب وين الاقيه .......؟؟؟؟؟؟؟

واذا بتجتمعون عطونا خبر برسايل الجوال.....؟؟؟؟

وعلى فكره مرقى ام دكه انا اشووف دايم على اليمين عن المرقى فوق دايم اشوف شروكيات واقفه بهالمكان ......
سلطان
01-30-2010, 09:31 PM
انا كل اربعا وخميس هناك واشوف شروكيات
بس ماعرف احد منهم
مؤيد للموضوع
cherokee.1996
01-30-2010, 11:50 PM
أنا الخميس موب هذا اللي قبل كنت في أم دكة .. واله يالشروكيات وااااجد ما شاء الله .. من جد

وخصوصآ وأنت وجهك لم أم دكة على الجال الايمن فيه شروكيات واجد موقفين :pirate2:


لكن ما شفت من اللي أعرفهم إلا حمد جاي بالـ ط ب ر ولا جاب المرهم :biggrin:




و يمكن اللي جالس على الجال شافني والدبة طايحة هههههههههههههه << كل ما ذكرت السالفة قعدت أضحك



وأنا مؤيد لأم دكة جدآ ,, وإن رحنا نروح مبكرين عشان نأخذ الجال كله :pirate2:





أخوكم . cherokee.1996
jeep1999
02-06-2010, 11:04 AM
يأخـوان ام دكـه وين وصفه ومن وين نروح له وكم تبعد عن الرياض اقصد السلي ههههههههههههههههه
نبي وصف لها عشان نجيكم
ابورغد
02-06-2010, 04:08 PM
وصف نفود ام دكه
وانت طالع بطريق مكه السريع وبعد ماتتعدى المزاحميه يجيك مخرج 5 وعليه لوحه ( جو ) اطلع مع المخرج وارجع (u) وجهك شرق كأنك راجع للرياض
أول محطه على يدك اليمين لونها وردي بعدها طريق يمين تحت الإنشاء اطلع معه على طول لحد ماتجيك الخراره على اليسار تعدها
بعد حوالي 1 كيلو تلاقي مسجد وكم غرفه على اليسار مهجوره
وقف عندها ونسم كفرات موترك وافرق يمين وجهك غرب
وبعد حوالي 3 كيلو نفود بتلاقي قاع والناس حوله
هذا نفود ام دكه
( بس للمعلوميه تجمعات الشباب والمرهمات في ام دكه أيام الخميس فقط)
abonorah
02-08-2010, 06:45 PM
http://www.jeep-ksa.com/up//uploads/images/jeep-ksa-64bee77a09.jpg

بالتوفيق لكم
ابورغد
02-08-2010, 09:16 PM
أبو نوره يعطيك ألف عافيه على الخريطه والتوضيح
أشكرك على مرورك ,,,
عمووو
02-08-2010, 09:36 PM
:wavetowel2:ررررررررررررررحب ابو رغد
انا من ناحيتي كل خميس هناك وكل خميس وانا مع ههههههههه واشوفك بس ياليت الشباب يعزمون ويخلون وجهتهم هناك مع العلم ان الموقع احلا من الثمامه ومشاكلها بكثيرررررر
ومع السلام عليكم هههههههههههههههههههه
حر ولد حر
02-08-2010, 09:50 PM
جزاك الله خير يا ابو نوره على الوصف

سئلة كثير من الشباب و كل واحد يعطيني وصف غير الثاني

الحين مافيه عذر

و شكراً لابو رغد على طرح الفكره
abonorah
02-08-2010, 10:51 PM
أبو نوره يعطيك ألف عافيه على الخريطه والتوضيح
أشكرك على مرورك ,,,

جزاك الله خير يا ابو نوره على الوصف

سئلة كثير من الشباب و كل واحد يعطيني وصف غير الثاني

الحين مافيه عذر

و شكراً لابو رغد على طرح الفكره

لا شكر على واجب والخريطة للامانة منقولة من أحد المنتديات ولكن ليس على الصورة
اي توقيع .


سلام
شروكي98
02-09-2010, 03:20 PM
والله الفكره حلوه ابو رغد وانا اؤيد الفكره وانا انشاء الله الخميس الي جاي راح اكون هناك وراح اجمع كم شيروكي معي

تحياتي وشكرا ع الموضوع او الفكره الاكثر من رائعه
ابورغد
02-10-2010, 01:42 AM
عموووو وابن الحر العفو
وأشكر الجميع على المرور
ونتمنى اننا نكون خدمنا منتدانا بأي فكره
وأنتظر تعليق منسق التجمعات (طلال) على الموضوع .
alhwawy37
02-11-2010, 06:25 AM
وانا مؤيد لراي الشبااااااااب